23.12.2005 Si è sierade îr di sere, a Udin, la novesime Mostre dal cine furlan. Intant de serade si è davuelte ancje la premiazion dal concors cinematografic che al viodeve in corse cuindis produzions dividudis in trê sezions. Inte prime sezion, dedicade ai films di finzion disore dai 20 minûts, la jurie e à decidût di no dâ nissun premi. Inte seconde sezion invezit il prin premi al è lât ex aequo a dôs voris, o sei “Mugulis” di Giorgio Cantoni e Stiefin Morat e “Puar Beppin” di Lucia Salmaso, Daniele e Massimo Bocus. Cun di plui, inte stesse sezion, i è lade une menzon speciâl al film documentari “Crasulas a Enemonç” di Stefano Morandini che al à ancje vinçût la prime edizion dal premi “Quargnolo” pe miôr idee origjinâl. In fin, te tierce sezion, dedicade ai films par fruts e par fantacins, il prin premi al è lât a “La suriute golosone” di Alberto Valentinuz.
