Leç sul furlan: comis boçâts de Cort Costituzionâl

23.05.2009 La Cort Costituzionâl, cu la sentence 159/2009, e à declarât ilegjitim cualchidun dai comis che a formin la leç regjonâl 29/07 su la lenghe furlane aprovade tal Dicembar dal 2007, intant de aministrazion Illy. Ta cheste maniere e à fatis buinis cuasi dutis lis domandis rivadis dal guvier Prodi che al veve decidût la strade de impugnazion de leç regjonâl.
A jessi declarâts no legjitims a son i passaçs che a previodin l'insegnament de lenghe furlane par almancul une ore a setemane, ma ancje la modalitât sugjeride de leç pal acès dai fruts al insegnament de nestre lenghe. Boçade la pussibilitât pes aministrazions locâls di doprâ toponims dome par furlan. Cun di plui, pai judiçs de Cort Costituzionâl, i uficis regjonâi che si cjatin fûr de aree perimetrade tant che furlanofone, no son tignûts a rispuindi par furlan a chei citadins che a sielzin di doprâ cheste lenghe. La Consulte e à ancje limitât la pussibilitât de comunicazion e de publicitât istituzionâl par furlan. Nuie di fâ nancje par modalitâts di traduzion dai intervents par furlan intai orghins publics diviersis di chês fissadis de leç statâl 482. E je stade judicade legjitime invezit la pussibilitât di finanziâ l'insegnament de lenghe furlane ancje intai istitûts scolastics che si cjatin fûr de aree furlanofone.
La sentence, dut câs, no sarès rivade ae unanimitât. Il suspiet al nas de decision dal judiç relatôr (e vicepresident de Cort) Ugo De Siervo, di rinunciâ a scrivi lis motivazions de sentence.
Denant di cheste sentence cualis sono stadis lis reazions dal mont politic regjonâl? Il president de Regjon, Renzo Tondo, al à fevelât di risultât cuasi scontât. Dut câs, al à ancje zontât che la revision de leç sul furlan no je une prioritât de sô aministrazion. L'assessôr regjonâl pe culture, Roberto Molinaro, al à fevelât di une sentence che e elimine i “ecès” de leç e che e ufrìs indicazions utilis su la autonomie de Regjon in teme di scuele. No dutis lis fuarcis de maiorance regjonâl a àn cjapât in maniere positive la sentence de Cort Costituzionâl. Al è il câs, in particolâr, de Leghe Nord che, par bocje dal so segretari Pietro Fontanini, e à fat savê che si impegnarà par evitâ altris limitazions de leç. L'ex assessôr regjonâl pe culture, Roberto Antonaz, che al veve stât daûr ae leç, al à fevelât di vitorie di une concezion pericolose dal dirit, cuasi di stamp fassist.  La sentence e à jevât une vore di marum ancje framieç des associazions e dai comitâts che si batin pai dirits linguistics dai furlans, ducj dacuardi però te volontât di no molâ.