03.04.2009 Si jere just ai 3 di Avrîl dal 1077 cuant che l'imperadôr Indrì IV al ricognosseve al patriarcje di Aquilee Siart il podê civîl, in plui di chel religjôs, sul Friûl. Cheste date e ven duncje calcolade di nassite dal stât patriarcjin furlan, che al restarà indipendent fintremai il 1420. A sburtâ par che cheste date e deventàs un moment di cussience par ducj i furlans al jere stât pre Checo Placerean intai agns Setante. E nas in chê volte la fieste de Patrie dal Friûl che, za di cualchi an, e à vût ancje un ricognossiment uficiâl de diviersis istituzions.
A son cetantis, duncje, lis iniziativis par memoreâ chest inovâl che si davuelzin ator pal Friûl: cualchidune e je za tacade îr di sere, ma i apontaments a laran indenant fin a domenie. Chest an, la iniziative principâl si davuelç a
Buie e e je stade imbastide des Provinciis di Pordenon e di Udin, dal Istitût Ladin Furlan “Pre Checo Placerean” adun cul Comun di Buie e cu la partecipazion de Regjon, des trê diocesis furlanis, de Universitât dal Friûl, de ARLeF, dal Ufici Scolastic Regjonâl, de parochie e de Pro Loco di Buie. Par chel che si riferìs a cheste manifestazion la plui part dai apontaments si davuelzarà tra doman e domenie. Sabide a 4 e mieze tal daspomisdì si varà la presentazion dal speciâl sui erois de "La Patrie dal Friûl" e a 6 la messe in lenghe furlane celebrade dal arcivescul di Udin, Pietro Brollo, e dai rapresentants des diocesis di Concuardie-Pordenon e Gurize. Domenie a misdì, te Place dal Domo, si davuelzaran invezit lis celebrazions civîls.
Lis iniziativis pe fieste de Patrie dal Friûl a son però une vore di plui. Vuê di buinore, alì de Universitât dal Friûl, si è davuelt un incuintri par fâ un belanç sul master par insegnâ in lenghe furlane inmaneât e coordenât dal
CIRF, il centri interdipertimentâl di ricercje su la culture e su la lenghe dal Friûl.
L'apontament organizât pe fieste dal Friûl de
ARLeF, la Agjenzie Regjonâl pe Lenghe Furlane, si davuelzarà invezit doman a matine a 9 e mieze alì de sale consiliâr di Trep Grant. Si trate di une cunvigne organizade par aprofondî il teme de tutele des minorancis linguistichis, a 10 agns de jentrade in vore de Leç 482/99. Te stesse zornade aes 18.30 li de sede dal Comun di Aquilee si davuelzarà un incuintri dai sporteliscj di lenghe furlane, dulà che i operadôrs a podaran confrontâsi su lis lôr diviersis esperiencis.
Sul front istituzionâl, la fieste de Patrie dal Friûl e je stade ricuardade îr intant dai lavôrs de Assemblee regjonâl dal president dal Consei Edouard Ballaman che al à cjapade la ocasion par rilançâ la specialitât e la autonomie de nestre Regjon. Ancje il president de Zonte, Renzo Tondo, al à ricuardât la fieste intal si blog.
A
Aquilee, cûr dal patriarcjât e antighe capitâl dal Friûl, vuê a 4 e mieze tal daspomisdì si intutule il palaç de Fondazion par Aquilee, a pre Giovanni Meizlik, predi di Aquilee fin al 1915, arestât e po internât des autoriâts talianis cu la acuse di jessi antitalian. Finide la cerimonie, si scree la mostre su la Ete di mieç furlane scolpide tal len di Bepi Agostinis. La Fieste dal Friûl e cjape dentri ancje la ore des storiis pai fruts alì de biblioteche di Aquilee.
Une altre inziative pai 3 di Avrîl, inmaneade de associazion culturâl El Tomât, si davuelç a 8 e mieze di sere a Madone di Buie intal centri de comunitât. Intal salon de provincie di Udin, a 5 e mieze, si presentin i ats su furlan e ladin te normative e a scuele.
Altris apontaments a son in program a sîs sot sere a Basilian, alì dal centri civic; a Pasian di Prât, alì de sal consiliâr; a Sant Zuan dal Nadison, alì dal Comun; a siet sot sere, in glesie, a Cjarlins; a vot e mieze a Codroip alì de biblioteche; a Udin in place Sant Jacum; a Faedis alì de sale consiliâr; a Lavarian inte cjase de zoventût; a Liztize in Comun, a Merêt di Tombe alì dal Consei comunâl; a Vildivar, alì de glesie di Sant Nicolò; a nûf mancul un cuart a Flaiban alì dal centri sociâl, e a Maian alì dal auditorium.
