04.03.2009 Tal daspomisdì di îr il Consei di Aministrazion de ARLeF – la Agjenzie Regjonâl pe Lenghe Furlane – al à nomenât il gnûf Comitât Tecnic Sientific, ven a dî l'orghin che al viôt di meti jù i plans regjonâi di politiche linguistiche e il program anuâl des ativitâts de ARLeF, ma ancje di valutâ i progjets fats indenant di aministrazions publichis o di altris sogjets istituzionâi. I siet membris a son stâts sielzûts daûr dai setôrs di competence: pe planificazion linguistiche a son stâts nomenâts Donato Toffoli e Piera Rizzolati; pe didatiche Alessandra Burelli e Pierino Donada; pai mieçs di comunicazion William Cisilino e Luca Peresson; e, in fin, pe produzion artistiche, musicâl, multimediâl Maria Carminati.
