25.02.2009 Ai
27 di Fevrâr e torne su Radio Onde Furlane la
Zornade Furlane dai Dirits, in memorie dal riviel sclopât in Friûl la Joibe Grasse dal 1511 cuant che lis comunitâts rurâls furlanis si jevarin in armis par difindi i lôr dirits.
Ta cheste zornade si propon duncje programazion speciâl cun chê di stiçâ la riflession sui dirits dai furlans e su lis bataiis inviadis par difindiju. Dut câs si cirarà di fâ il pont sul stât dai dirits linguistics e nazionâi ancje di altris comunitâts minorizadis tant che slovens e todescs dal Friûl (cun intervistis ae diretore dal “Novi Matajur”
Jole Namor e ae presidente dal circul culturâl Schneider di Sauris
Lucia Protto), rom e sinti (cun
Eva Rizzin, rapresentante dal comitât “Rom e Sinti insieme”). Il teme dai dirits linguistics al sarà frontât ancjein riferiment ae Glesie cun pre
Roman Michelot, di “Glesie Furlane”, e cul vicediretôr dal mensîl “La Patrie dal Friûl”
Christian Romanini.
Par chel che si riferìs ai aprofondiments sui diviers dirits, invezit, chest an si fevelarà dal dirit ae cjase cun
Luciano Aita, president de ATER di Udin, e cun
Maurizio Ingegneri, coordenadôr de associazion “Vicini di Casa”. Un altri teme frontât al sarà chel dai dirits des feminis: si ‘nt fevelarà cun
Lauretta Serafini (“Federcasalinghe” dal Friûl – Vignesie Julie) e cun
Eleonora Baldacci, responsabile de associazion “Io tu, noi, voi” in prime linie tal judâ lis feminis che a àn patît violence. I ûs civics e lis proprietâts coletivis a saran, invezit, al centri de interviste cun
Nadia Carestiato, ricercjadore universitarie e esperte dal setôr.
Dal riviel de Joibe Grasse dal 1511 e des resons che a ‘nt forin la fondesi varà ospit il professôr
Furio Bianco, de Universitât dal Friûl e autôr dal studi plui impuartant publicât in Friûl su chest argoment.
Ai 27 di Fevrâr ancje la programazion musicâl di Onde Furlane e sarà speciâl cul miôr de musiche furlane e di altris nazionalitâts tibiadis, e cuntune trasmission di pueste curade di
Pauli Cantarut. La jentrade de Zornade e sarà curade, invezit, dal diretôr de Radio,
Mauro Missana, e dal puartevôs dal Comitât 482,
Carli Pup.
Buine scolte e buine Zornade Furlane dai Dirits a ducj.
ZORNADE FURLANE DAI DIRITS
Programazion dai 27 di Fevrâr dal 2009fin a 08.30 - musiche furlane e des minorancis
08.30 -09.00 jentrade ai programs de buinore cun Mauro Missana e Carli Pup
09.00-10.00 aprofondiment storic su la Joibe Grasse dal 1511 cun Furio Bianco
10.00-11.00 dirits in musiche par cure di Pauli Cantarut
11.00-11.30 dirits linguistics: la situazion dai slovens dal Friûl cun Jole Namor
11.30-12.00 dirits linguistics: la situazion dai todescs dal Friûl cun Lucia Protto
12.00-12.30 dirits violâts: la situazion di rom e sinti cun Eva Rizzin
12.30-14.30 musiche furlane e des minorancis
14.30-15.00 jentrade ai programs dal daspomisdì cun Mauro Missana e Carli Pup
15.00-15.30 une leture storiche sul 1511 (par cure di Stefania Nonino)
15.30-16.00 dirit ae cjase in Friûl cun Luciano Aita e Maurizio Ingegneri
16.00-16.30 dirits des feminis in Friûl cun Lauretta Serafini e Eleonora Baldacci
16.30-17.00 proprietâts coletivis e ûs civics in Friûl cun Nadia Carestiato
17.00-17.30 glesie e dirits linguistics cun pre Romano Michelot e Christian Romanini
17.30-18.30 dirits in musiche par cure di Pauli Cantarut (R)
18.30-19.30 aprofondiment storic su la Joibe Grasse dal 1511 cun Furio Bianco (R)
des 19.30 indenant - musiche furlane e des minorancis
