24.11.2008 Ancje chest an al torne l'apontament cun “Musiche - Pe gnove musiche furlane”, la manifestazion inmaneade dal Comun di Udin par promovi lis miôr produzions musicâls in lenghe furlane. La iniziative si davuelzarà
vinars ai 28 e sabide ai 29 di Novembar alì dal teatri
Palamostre di Udin (a tacâ des
9 di sere). Ancje chest an, Musiche e cjaparà dentri il Premi Friûl, concors nassût par sburtâ grups e musiciscj gnûfs che a cjantin par furlan che al è rivât bielzà ae vincjesime seste edizion.
Vinars Musiche e proponarà i R.esistence in Dub, e lis gnovis produzions di Lino Straulino e di Loris Vescovo, di bessôi e in trio cun Stefano Fedele. Inte suaze dal Premi Friûl, invezit, si podarà scoltâ Fîl e Fiâr (alternative rock), Francis and the Phantoms (dark wave), e Limerik (cjançon di autôr).
Sabide il Premi Friûl al viodarà in gare Eletrike Skeletriche Poetiche (eletroniche sperimentâl), Claus (punk rock), e Accordincanto (pop acustic). Musiche, invezit, e proponarà i ultins lavôrs dai Arbe Garbe e dai Strepitz. A sierâ la serade i pensarà po il cjantant cors Jacques Culioli (
te foto cun dut il so grup), vincidôr de edizion 2008 dal Liet Lavlut, o sei il plui impuartant festival european in lenghe minoritarie.
