19.09.2008 Il 2008 al è stât proclamât de Assemblee gjenerâl de ONU tant che an internazionâl des lenghis cun chê di sburtâ ducj i siei membris a promovi e a difindi dutis lis lenghis, massime chês minorizadis o in pericul. A coordenâ lis ativitâts leadis a chest acjadiment e je la UNESCO che e à segnalât un pôcs di progjets ator pal mont che ben si insuazin tal spirt di cheste iniziative. Inte
liste dai progjets segnalâts (in dut mancul di dusinte) al è ancje
Sgarfefurlans, fat di Informazione Friulana – Radio Onde Furlane par cont de Comunitât Culinâr dal Friûl. Il
progjet, curât sul cjamp di Loris Vescovo, al à permetût di cjapâ sù sul puest e po di proponi al public di chenti lis storiis e lis esperiencis di emigrants di divignice furlane che a vivin e a lavorin tra Oceanie, Cine e Sud Est asiatic. Un progjet che al mostre ancje la vivarositât di une lenghe, chê furlane, che e va dilunc a jessi fevelade ancje dai nestris emigrants ator pal mont. Sgarfefurlans al è un pôcs progjets produsûts intal stât talian segnalâts de UNESCO.
