07.09.08 A tachin lunis lis presentazions ator pal Friûl di une publicazion che e met adun materiâi par un cors di lenghe furlane par students di etât adulte. Si trate di “
Lenghe. Cors di Furlan” di Stefania Garlatti-Costa e Roberta Melchior, publicât dal Consorzi Universitari dal Friûl. Il materiâl al è pensât par podê jessi doprât di personis cun abilitâts diferentis: di chei che a capissin ben il furlan, ma no lu fevelin, a chei che lu cjacarin tant che lenghe native, ma no son bogns di leilu e scrivilu. Cun di plui e ten cont ancje dai lengaçs specialistics, tant che chei pe aministrazion, pe medisine, pal gjornalisim. La publicazion si svilupe suntun libri dal student, une vuide pal insegnant, e un fassicul cu lis soluzions dai esercizis (cun materiâi par 60-80 oris di insegnament). Il lavôr publicât dal CUF al rispuint a di une mancjance di materiâi didatics specifics pal insegnament pai adults: un setôr che al ven sburtât sei la leç statâl 482/99, sei de gnove leç regjonâl 29/07 su la lenghe furlane. La prime presentazion uficiâl e je in program doma, lunis ai 8 di Setembar, a 10 di matine alì de sale cunvignis de Comunitât montane de Cjargne a Tumieç. Te stesse zornade, ma a 3 tal daspomisdì, si varà une altre presentazion alì de sale “Soffietto” dal Ospedâl di Udin (paveon de jentrade, IV plan). Miercus ai 10 di Setembar il materiâl al sarà presentât a Gurize alì de sale dal Consei provinciâl a 10 di buinore e po, a 3 tal daspomisdì, alì de sale “Azzurra” de Aziende sanitarie de Basse furlane a Jalmic. Il cicli di presentazions si sierarà vinars ai 12 di Setembar a 10 di matine a Pordenon, alì de sale stampe dal palaç de Provincie.
