08.07.2008 Cun 32 vôts a pro e 4 contraris il Consei comunâl di Pordenon al à fate buine îr di sere la delibare là che si domande di jessi tirâts fûr de aree là che si metarà in vore la gnove leç regjonâl su la lenghe furlane. Il vôt al è rivât daspò di un dibatiment une vore lunc e vivarôs, là che ancje une part de maiorance e à contestât la sielte dal sindic. Dut câs, ae fin de discussion, i numars a àn palesât a clâr la volontât trasversâl di maiorance e oposizion di lâ indenant pal troi segnât dal prin citadin pordenonês Sergio Bolzonello (
te foto). Daûr di cheste decision - al à spiegât il sindic - a son massime dôs motivazions: une plui di stamp formâl, ven a dî la mancjance di un at formâl dal Comun che al domandàs la inclusion dal teritori inte aree furlanofone; e une plui sostanziâl, cu la preocupazion pai servizis previodûts de leç e pai lôr coscj. Il prin citadin di Pordenon al domande une revision de leç regjonâl sul furlan, orientade plui sui aspiets culturâi che no su chei dai servizis linguistics pai citadins. Par chest - al à zontât - no si podeve rimandâ il vôt di cheste delibare, che e vûl dâ un segnâl fuart ae Regjon par mendâ la leç.
