23.06.2008 Il furlan tant che lengaç di mode, di cubiâ cul inglês e di doprâ poiantsi suntun sisteme multimediâl. A son lis liniis de gnove campagne di promozion de lenghe furlane inmaneade de ARLeF (Agjenzie Regjonâl pe Lenghe Furlane) che e je stade batiade “Furlanication” e che e je indreçade al public plui zovin. La idee e je chê di sburtâ il furlan là che fin cumò nol jere rivât, par esempli tal circuit des radios comerciâls, e di rivâ ator par dute la aree furlanofone e no dome. Cheste campagne par alçâ il status de lenghe e je stade presentade vuê di buinore alì dal palaç de Regjon, a Udin. Par presentâle a jerin: l'assessôr regjonâl pe culture Roberto Molinaro; il president de ARLeF Lorenzo Fabbro; Giuseppe Mariuz dal Comitât tecnic sientific de ArleF; Il diretôrs dal servizi regjonâl pes identitâts linguistichis Marco Stolfo; Cesare Di Fant dal grup Vivaradio; e Lorenzo Vignando coordenadôr dal progjet.
