05.06.2008 Daspò dal alarm di îr, che al à puartât a sierâ la centrâl nucleâr di Krško in Slovenie, la Agjenzie Regjonâl Pal Ambient dal Friûl – Vignesie Julie al à davuelt doi controi (a 2 di gnot e a 7 e mieze di vuê di buinore) par viodi che no si vedi presince di radioativitât. I controi a àn interessât campions cjapâts sù tes provinciis di Udin, di Gurize e di Triest e no àn mostrât nissun element fûr dal normâl par chel che al rivuarde la radioativitât.
Inte nestre regjon, l'incident intal implant sloven al à dât une scjassade al dibatiment politic tra cui che al è a pro dal nucleâr intal stât talian e cui che al è cuintri, ma al à ancje fat intervignî lis associazions ambientalistis. Legambiente dal Friûl – Vignesie Julie e à tornât a marcâ i risis leâts aes centrâls nucleârs e e à invidât a pontâ su lis fonts energjetichis rinovabilis. Il WWF, invezit, al à tornât a domandâ aes autoritâts slovenis di meti a disposizion di chês talianis i siei programs nucleârs.
