07.05.2008 Prime riunion vuê di matine pal gnûf Consei provinciâl jessût des elezions dai 13 e 14 di Avrîl che al à scomençât la sô ativitât cu la convalide dal president de Provincie e dai conseîrs, par passâ po a elezi il so ufici di presidence. Vuê, il gnûf president, Pietro Fontanini, al à ancje presentât denant de Assemblee provinciâl i membris dal gnûf esecutîf e lis liniis programatichis de sô azion di guvier. La gnove Zonte e je formade di: Enio De Corte (UDC) pal ambient; Ottorino Faleschini (UDC) pe mont; Elena Lizzi (Leghe Nord) pe culture e pe tra paritât om e femine; Daniele Macorig (PdL) pal lavôr; Fabio Marchetti (PdL) pe viabilitât; Franco Mattiussi (PdL) pes ativitâts produtivis; Adriano Piuzzi (PdL) pes politichis sociâls; Stefano Teghil (Leghe Nord) pe edilizie; Mario Virgili (PdL) pal sport e pal personâl. Cuatri di lôr – ven a dî Piuzzi, Macorig, Marchetti, e De Corte – a jerin za assessôrs te legjislature stade. Fontanini, invezit, si à tignût lis deleghis pal belanç, pes riformis istituzionâls, pes politichis linguistichis e pai rapuarts cu lis societâts partecipadis. Te riunion di vuê di buinore il Consei provinciâl al à elet tant che so president, in seconde votazion, Marco Quai (PdL).
