06.05.2008 Prime riunion, vuê di buinore, dal Consei regjonâl che al à proviodût ae elezion dal gnûf ufici di presidence. Tant che gnûf president de Assemblee al è stât elet il leghist Edouard Ballaman che al va cussì a cjapâ il puest tignût te legjislature stade di Alessandro Tesini. Come vicepresidents, invezit, a son stâts votâts Maurizio Salvador de UDC e Annamaria Menosso dal PD. Chei altris conseîrs elets tant che segretaris dal Ufici di presidence a son Antonio Pedicini (PdL), Piero Tononi (PdL), Roberto Antonaz (Çampe - Arc di S. Marc), e Franco Brussa (PD). Vuê di matine i conseîrs a àn ancje fat il lôr zurament. Come che al previôt il regolament, un pôcs a àn ancje decidût di zurâ, in plui che par talian, tune des lenghis propriis dal Friûl – Vignesie Julie. Une domande par che a zurassin in plui lenghis ur jere stade indreçade ancje dal Comitât 482. Par furlan a àn zurât: De Mattia (LN), Baiutti (PD); Brandolin (PD); Brussa (PD); Franz (LN); Iacop (PD); Menis (PD); Menosso (PD); Molinaro (UDC); Picco (LN); e Violino (LN); Par sloven, invezit, a àn zurât Brandolin (PD); Gabrovec (Slovenska Skupnost); e Kociančič (Sinistra Arcobaleno).
Îr, invezit, si veve davuelte la prime riunion de gnove Zonte regjonâl là che Renzo Tondo al à ancje proviodût in maniere uficiâl a assegnâ lis deleghis che a viodin: Luca Ciriani, vicepresident e assessôr pes ativitâts produtivis; Elio De Anna pal personâl; Vanni Lenna pai lavôrs publics e pal ambient; Roberto Molinaro par istruzion e culture; Vladimiro Kosicç pe sanitât; Claudio Violino pe agriculture; Sandra Savino pal belanç; Alessia Rosolen par lavôr e formazion; Federica Seganti pes autonomiis locâls; e Riccardo Riccardi pai traspuarts.
