02.05.2008 A son stâts 13 mil, daûr dai dâts dai sindacâts, i lavoradôrs che îr a àn partecipât aes diviersis manifestazions inmaneadis di Cgil, Cisl e Uil in ocasion dal Prin di Mai. In Friûl – Vignesie Julie a son stâts cinc i lûcs che a àn dât acet aes iniziativis imbastidis dai sindacâts pe fieste dai lavoradôrs: Çarvignan, là che a àn partecipât sù par jù 3 mil personis tra lavoradôrs, pensionâts e membris dai Comitâts No Tav dal Friûl (
te foto a man drete); Gardiscje dal Lusinç là che si stime che a vedin partecipâts uns 2 mil lavoradôrs rivâts di dut il Gurizan; Pordenon, là che si son dâts dongje 800 lavoradôrs; Lusevare, là che chest an e à partecipât ancje une delegazion sindacâl slovene e là che a jerin sù par jù 200; e po Triest. Lis manifestazions sindacâls di chest an a vevin al centri doi temis, ven a stâi la sigurece tai puescj di vore e la difese dai redits dai lavoradôrs e dai pensionâts. Tal 2007 inte nestre regjon si àn vûts 28 mil incidents sul puest di vore, 22 di chescj mortâi: si trate di cifris che a metin il Friûl – VJ ai prins puescj a nivel talian par numar e gravitât di incidents. La tindince dai incidents a sbassâsi si è fermade tal 2005 – al à dite Ezio Medeot, de segretarie regjonâl de Cgil – e, duncje, par saltâ fûr di cheste situazion e je bisugne di un impegn plui fuart des aziendis, dai sindacâts, ma ancje de Regjon che e à vût plui competencis su cheste materie dal test unic su la sigurece.
