02.04.2008 Ta cheste setemane a colin i 3 di Avrîl, zornade che si ricuarde la nassite uficiâl dal stât patriarcjin furlan e che di diviers agns si celebre tant che fieste dal Friûl. Ta chê zornade si varan diviersis iniziativis sul teritori par ricuardâ l'inovâl, ma i prins apontaments leâts ae fieste dai 3 di Avrîl a son bielzà scomençâts. La manifestazion principâl e je chê inmaneade dal Istitût Ladin Furlan “Pre Checo Placerean” a
Cordovât, in colaborazion cul Comun e cu la Pro Loco de citadine dal Friûl Ocidentâl. Iniziative e viôt ancje la partecipazion de Regjon Autonome Friûl Vignesie Julie, des Provinciis di Pordenon e di Udin, des Diocesis di Gurize, Concuardie-Pordenon e Udin, de Universitât dal Friûl e dal Ufici Scolastic Regjonâl. Ai 6 di avrîl il program de iniziative al previôt a 10.30 la messe par furlan in domo, a 11.45, daspò de esibizion dai sbandieradôrs, la leture dal diplome di Indrì IV alì de Vile Freschi Piccolomini cui intervents des autoritâts e la premiazion dal concors “Disegne la storie dal Friûl 2008” inmaneât des Provinciis di Udin e Pordenon. Tal dopodimisdì al sarà pussibil partecipâ aes visitis guidadis al Borc antîc. Simpri a Cordovât, ma ai 3 di Avrîl, a 20.30 intal domo, si tignarà il conciert de Orchestre Sant Marc di Pordenon e ai 5 di Avrîl a 16.00 li dal Palaç Cecchini e sarà screade la mostre “Cordovât inte Patrie dal Friûl”. Dut câs, lis iniziativis si davuelzaran ancje di altris lûcs dal Friûl, là che aromai si à svilupade une salde rêt di apontaments. Ai 5 e ai 6 di Avrîl si varà une manifestazion impuartante ancje a
Aquilee, cun diviers moments di aprofondiment culturâl, ma ancje spazis musicâi, mostris, visitis guidadis, laboratoris par grancj e piçui e ancje un marcjât solidari. Tra lis variis iniziativis o segnalìn ancje chê in program ai 3 di Avrîl alì dal auditorium – biblioteche di
Cjamin dal Tiliment, là che a 9 di sere si davuelzarà une iniziative par ricuardâ pre Toni Beline cun intervents di pre Romano Michelotti, Gotart Mitri e Federico Rossi. Simpri te stesse zornade, a 9 di sere, si varà une rapresentazion storiche, leterarie, musicâl dedicade ai 3 di Avrîl alì de gleseute di Sante Marize di
Vildivar, che e sarà po replicade ai 5 di Avrîl alì de glesie di Madrîs. Usgnot, 2 di Avrîl, invezit a
Buie, alì de ostarie di parùs a Saramont, a 8 e mieze si sere, si spiete la fieste de Patrie dal Friûl cui videos di Musiche Furlane Fuarte tune colaborazion tra la associazion “El Tomât” e Onde Furlane. Dut câs, par savênt di plui su lis iniziativis in program, joibe a matine la nestre emitente e dedicarà un spazi di pueste par fevelâ dai 3 di Avrîl.
