Radio Onde Furlane e je la ativitât principâl e forsit chê che si viôt di plui de Cooperative “Informazione Friulana”, ma no je la sole. In vincjecinc agns di ativitât si à fat un lavôr pardabon grant par promovi e svilupâ la lenghe furlane cun intervents direts in diviers setôrs là che il public si faseve viodi pôc, cuant che no nuie.
Al è aromai un dât ricognossût che une lenghe si salve e e vîf libare dome se e cjape sù funzions comunicativis gnovis e adatis a dutis chês musis diferentis che une societât complesse e à. Une lenghe minoritarie e à di cjatâ spazi inte scuele, tai mieçs di comunicazion di masse, tai uficis publics e in ducj chei elements che in dì di vuê a formin il panorame comunicatîf.
“Informazione Friulana” e à duncje cirût di intervignî no dome cul fâ informazion e culture in lenghe furlane par radio, ma ancje par mieç de television e di Internet, e po sburtant la produzion musicâl e artistiche, metint adun imprescj linguistics inovatîfs e lavorant inte scuele.
